- Tíðindi, mentan og ítróttur
Talvlandsliðið til OL sett
![](https://kvf.fo/sites/default/files/styles/grein-ovasta-mynd/public/ba4fc416267ebc478dbcdea4bbbfd918.png?itok=X-MLVxxr)
Helgi Dam Ziska, John Arni Nilssen, John Rødgård, Rógvi Egilstoft Nielsen og Jóan Hendrik Andreasen fara at umboða Føroyar á stóru talvstevnuni.
Endaliga borðrøðin er ikki ásett enn, men eingin ivi er um, at Helgi Dam Ziska situr á 1. borði. Hvussu hinir fýra sita, er støða ikki tikin til enn.
Helgi, John Arni og John eru altjóða meistarar. Olaf Berg og Høgni Egilstoft Nielsen skuldu ætlandi vera við, men hvørgin fekk farið.
Tríggir útisetar eru á liðnum
Helgi Dam Ziska er undir lestri í Skotlandi, men er um at vera liðugur. Hann er nógv framfarin sum telvari seinnu árini, tó at lesturin hevur lagt meinbogar í vegin fyri royndunum at røkka málinum at gerast stórmeistari.
John Arni Nilssen og Jóan Hendrik Andreassen búgva í Danmark og telva nógv. Báðir hava havt góð úrslit í seinastuni.
Talvolympiadan verður í aserbadsjanska høvuðsstaðnum Baku - heimbýnum hjá Garri Kasparov - í døgunum frá 1.- til 14. september.
Føroyar endaðu nummar 81 av 172 londum á seinastu talvolympiaduni, sum var í Tromsø í 2014.