Landið sparir rentur

Landskassin sparir 44 mió. kr. í rentu, nú landið hevur endurfíggjað skuldina við láni, sum hevur lægstu rentu, landskassin higartil hevur fíggjað síni lán fyri.

Rentan er hálvt prosent, og hon kostar seks milliónir krónur um árið. Rentan fyri lánið, sum nú verður endurfíggjað við nýggja láninum, er 3,75 prosent og kostaði hálvthundrað milliónir krónur um árið.

Landskassin sparir tí 44 mió. kr. í rentu um árið í fimm ár. Nýggja lánið, sum er ein milliard og 350 milliónir krónur, skal brúkast til at rinda lánið, sum fellur til gjaldingar um eina viku.

Rentan lægri enn væntað

Nýggja lánið skal gjaldast aftur um fimm ár, tann 22. juni í 2021. Sambært Fíggjarmálaráðnum var væntað, at rentan fór at vera lág, men hon gjørdist lægri enn væntað.

Tíggju milliónir krónur av tí, sum er sett av í fíggjarlógini til rentur, eru tí spardar. Lánsmarknaðurin tykist hava størri álit á Føroyum nú.

Rentan, sum Føroyar fáa, er bara 0,25 prosent hægri enn Danmark rindar fyri síni lán. Í 1994 var hesin munur 2,25 prosent.

Nýggju lánsbrøvini vórðu seld í gjár, og tað var lætt at sleppa av við tey. Sølan tók ein tíma. Lánsbrøvini eru seld í Føroyum og uttanlands.