Messi dømdur fyri skattasvik

Lionel Messi, heimskendi argentinski fótbóltsspælarin, sat í juni á ákærubeinkinum. Nú er dómur fallin í málinum, skrivar tíðindastovan, Reuters.

Bæði hann og pápin eru dømdir 21 mánaðar treytaða fongsulsrevsing tí teir hava svikað við skatti. Tað er niðurstøðan hjá rættinum í Barcelona.

Messi skal, umframt treytaða fongsulsdómin, eisini gjalda eina bót til spanska landskassan, 3,7 milliónir evrur, skrivar tíðindastovan, AFP.

Svikaðu fyri 40 milliónir

Málið móti Lionel Messi og pápanum, Jorge Horacio Messi, kom undan kavi í 2013. Sambært ákærumyndugleikanum fór skattasvikið fram frá 2007-2009.

Messi-familjan hevur snýtt skattamyndugleikarnar fyri meira enn 30 milliónir krónur við at brúka feløg í Belize og Uruguay, siga myndugleikarnir í Spania.

Peningurin, teir nú eru dømdir fyri at hava svikað við, stavar frá stórum sponsoravtalum við fleiri stór feløg, sambært skattamyndugleikunum í landinum.