Anita ikki søkt um fiskiloyvi

Garnaskipið Anita fær í dag rættin at fiska í føroyskum sjógvi aftur, men sambært Vørn hevur reiðaríið ikki biðið um fiskiloyvi til nýggja fiskiárið, sum byrjar í morgin.

Málið um Anitu byrjaði 11. februar í 2014, tá ein maður sló út og druknaði, meðan skipið setti gørn undir Føroyum.

SÍ EISINI M/B Anita: Maður dottin fyri borð

Tá kom undan kavi, at útlendska manningin umborð arbeiddi undir ivasomum viðurskiftum, at avgerðarrætturin í reiðarínum var útlendskur, og skipið í fleiri førum breyt lógina um vinnuligan fiskiskap.

Millum annað fiskaði Anita við alt ov nógvum gørnum, og Sjóvinnustýrið staðfesti eisini, at trygdin umborð var ikki í lagi.

Vørn staðfesti, tá málið var fyri í rættinum, at talan var um tey grovastu lógarbrotini í føroysku fiskivinnuni nakrantíð og mælti landsstýrinum til at taka fiskiloyvi frá Anitu med alla.

Einki net síðani mai

Málið endaði við, at skipari og reiðarí fingu 450.000 krónur og at skipið misti rættin at fiska til í dag, 31. august í 2016.

Reiðarin, Søren Christiansen, segði, tá tann avgerðin fall, at hann fór at stevna landsstýrinum eftir endurgjaldskravi fyri frátikna fiskiloyvi, men í mai boðaði Jens Andrias Winther, advokatur frá, at hann gavst at umboða felagið.

Síðani er einki hent í málinum, og nú Anita kann fara aftur til fiskiskap, hevur reiðaríið ikki søkt um nýtt fiskiloyvi.