Trupult hjá kvinnum at fáa lønarhækkan

Tað er munandi truplari hjá kvinnum at fáa lønarhækkan á arbeiðsplássinum enn hjá monnum, vísir nýggj gransking. Kynsmismunur heldur professari

Tað er lættari hjá monnum at fáa lønarhækkan enn tað er hjá kvinnum, er niðurstøðan í granskingarverkætlan við 4.600 fólkum

Bjarni Mohr

06.09.2016 - 15:27

Kvinnur spyrja líka ofta sum menn um at fáa lønarhækkan, men tær fáa sjálvdan lønarhækkan, er niðurstøðan í gransking hjá University of Warwick.

Sannlíkindini fyri, at fólk á arbeiðsmarknaðinum fáa lønarhækkan, er 25 prosent størri hjá monnum enn kvinnum, staðfestir granskingin.

Granskarar funnu einki prógv fyri, at menn oftari spyrja um lønarhækkan enn kvinnurnar. Tí kann tað ikki vera orsøkin til munin, siga granskararnir.

Heldur talan vera um diskriminering

- Við granskingini í huga haldi eg, at talan kann vera um ávísan kynsmismun móti kvinnum, sigur Andrew Oswald, professari, sambært BBC News.

Eingi prógv vórðu funnin, ið geva ábendingar um, at orsøkin - til at menn oftari fáa lønarhækkan - er, at kvinnur smæðast við at spyrja um lønarhækkan.

Granskarar kannaðu til samans 4.600 fólk á arbeiðsmarknaðinum í Avstralia, ið hildið verður er tað einasta landið, har tað verður skrásett, tá fólk spyrja um lønarhækkan.