Hann skal fáa almenna løn

Tað ætlar Jákup Mikkelsen í Fólkaflokkinum. Hann hevur skotið upp, at landsstýrið skal gera uppskot um at stovna lønargrunn stórmeistara í talvi og reglur fyri virksemi hjá grunninum.

Jákup Mikkelsen sigur í viðmerkingunum til uppskotið, at í Íslandi er serlig lóg um lønargrunn, sum skal tryggja íslendskum stórmeistarum í talvi fíggjarligan grundvøll.

SÍ EISINI Helgi Dam Ziska: Havi kent trýst á mær

Fæið í grunninum verður játtað á fíggjarlógini á hvørjum ári, og upphæddin, sum stórmeistarin fær, svarar til lønina, sum lektarar á lærda háskúlanum í Íslandi fáa. 

Talvmeistarar, sum fáa løn úr grunninum, hava millum annað skyldu til at undirvísa á Talvskúla Íslands. Talvsmeistararnir í Ìslandi eru at rokna sum almenn starvsfólk.

Hevur týdning fyri einstaklingaítrótt

Helgi Dam Ziska er fyrsti og einasti føroyingur, sum higartil hevur er vorðin stórmeistari í talvi. Í øllum heiminum eru umleið 1300 stórmeistarar í talvi til samans.

Jákup Mikkelsen sigur, at í fámentari tjóð sum tí føroysku hevur einstaklingaítróttin stóran týdning. 

Eitt nú hava føroyskir svimjarar staðið seg framúr væl í altjóða kappingum, og nú er ein føroyingur eisini komin í fremstu røð í telving.