Bíleggingar fyri eina millión

Tað stendur á at taka ímóti bíleggingum hjá matstovuni KOKS, eftir at matstovan í gjár fekk tillutað eina av høgt mettu Michelin-stjørnunum

Tað streymar inn við bíleggingum hjá matstovuni, KOKS, eftir at matstovan fekk tillutað eina Michelin-stjørnu mikudagin

Ingi Rasmussen

Bjarni Mohr

23.02.2017 - 12:36

KOKS merkir longu nú ágóðan av, at føroyska matstovan í gjár fekk handað eina Michelin-stjørnu í Stokkhólmi.

Bíleggingarnar streyma inn, og tað stendur á at taka ímóti. Ætlanin er, at nýggj matstova stendur klár í 2018.

Johannes Jensen, stjóri í Koks, ið hevur fingið ta fyrstu føroysku Michelin-stjørnuna, er ein fegin maður í dag, sigur hann við útvarpið.

Áhugi úr øllum heiminum

Síðan handanina, sum fór fram í Stokkhólmi í gjár, mikudagin, hava bíleggingarnar til matstovuna í Kirkjubø streymað inn úr øllum heiminum.

Bara eftir 24 tímum hevur KOKS fingið 428 bíleggingar úr 16 londum. Miðalprísurin fyri hvønn á KOKS liggur oman fyri 2000 krónur, so bíleggingarnar bara hetta fyrsta samdøgrið fara at tátta í milliónina.

Útvarpið fekk orðið á Johannes Jensen á flogvøllinum í Stokkhólmi á veg til Føroya. Hann viðgongur, tað hevur verið lítil friður eftir stóra heiðurin í gjár.