Onki kommunalt útboð

Miðflokkurin hevur skotið upp at broyta kommunustýrislóina, so álagt verður kommunum at bjóða út arbeiðið og annað, ið kostar meiri enn hálva millión krónur.

Tað skal tryggja fría kapping, sigur Miðflokkurin. Men ein samd rættarnevnd mælir frá at samtykkja uppskotið. 

Flestu kommunurnar bjóða út

Nevndin sigur í álitinum, at tá innkeyps- og útboðspolitikkurin fyri almenna geiran kom í 2011, varð avgjørt, at hetta skuldi ikki vera galdandi fyri kommunurnar.

Í staðin fyri at lóggeva, áttu kommunurnar sjálvar at lagt sín útbjóðingarpolitikk á sína heimasíðu, sum summar kommunur gera nú. Nevndin sigur eisini, at flest allar kommunur bjóða arbeiðið út.

Rættarnevndin sigur seg eisini hava fingið upplýst, at ein lógaráseting, ið áleggur kommunum at bjóða út, kann gera, at tann vinnan á staðnum verður køvd.