Royna nýggju ferðaseðlaskipanina við Teistanum

Um hálvan oktober verður talgilda ferðaseðlaskipanin sett í gildi á Gomlurætt.

Tað skrivar in.fo.

Tá fer at bera til at bíleggja ferðaseðil til bilin við Teistanum av Gomlurætt til Skopurnar á internetinum.

Men tey, sum skulu við Teistanum úr Skopun á Gomlurætt, mugu framvegis bíða á havnarlagnum í Skopun, tí borgarstjórin, Gerhard Lognberg hevur mælt frá at seta nýggju skipanina í gildi.

Hann heldur, at bíleggingarskipanin eigur ikki at fevna um allar bilarnar, tí tað verður ein forðing hjá eldri fólki, sum ikki dugir so væl við teldum.

Hilmar Eliasen, stjóri á Strandferðsluni, sigur við in.fo, at við talgildu ferðaseðlaskipanini ber til at tryggja sær pláss við ferjuni ein túr.

Eru pláss eftir, sleppa tey, sum ikki hava bílagt ferðaseðil, eisini við.