Kanna um rannsóknarstova kann vera opin oftari

Fyrst í nýggja árinum ætlar Sirið Stenberg, landsstýriskvinna, at kanna saman við Klaksvíkar sjúkrahúsi, um tænastan til teirra, sum hava brúk fyri at koma á rannsóknarstovuna í Runavík kann betrast. 

Tað sigur hon í svari til Kára P. Højgaard, løgtingsmann, sum spurdi um laboratoriið í Runavík.

Tað er opið hálvan annan tíma ein dag um vikuna. Tað er alt ov lítið, sigur Kári P. Højgaard. 

Fleiri til Klaksvíkar

Sambært Klaksvíkarar sjúkrahúsi eru 2.300 vitjanir á rannsóknarstovuni í Runavík um árið. 

Samstundis upplýsir sjúkrahúsið, at fleiri og fleiri fólk í Eysturoynni koma á sjúkrahúsið í Klaksvík at fáa tiknar blóðroyndir.

Hetta kundi bent á, at tilboðið í Eysturoynni er ov avmarkað. sigur Sirið Stenberg. 

- Eg ætli mær tí fyrst í komandi ári saman við Klaksvíkar sjúkrahúsi at kanna, um og hvussu tænastan til teirra, sum hava brúk fyri rannsóknarstovuni í Eysturoynni kann betrast, sigur landsstýriskvinnan.