Eingin kæra komin um Kristin

Meirilutin í Tvøroyar býráði hevur boðið minnilutanum fýra formanssessir í nevndunum í býráðnum, tað vil siga ein sess afturat teimum, sum minnilutin nú hevur og tók sær eftir valið, tá hann skipaði meiriluta.

Meirilutin skal so hava fýra formanssessir.

Men sambært Javnaðarflokkinum í býráðnum á Tvøroyri á Facebook er minnilutin ikki nøgdur við hetta. Hann krevur tríggjar formanssesir, borgarstjóran og varaborgarstjóran.   

Innlendismálaráðið hevur onga kæru fingið um borgarstjóran á Tvøroyri, sum uttan grundgeving hevur útsett býráðsfundin, sum sambært lýstu fundarskránni skuldi vera 8.januar.

Kommunala eftirilitið í Innlendismálaráðnum kann av sínum eintingum taka upp mál. 

Men tað er ikki gjørt í hesum førinum, sigur Hilmar Høgenni í Innlendismálaráðnum.

Meirilutin í býráðnum vísir til kommunustýrislógina í brævi til borgarstjóran og kommunustjóran á, at samtykta fundarætlanin, sum er kunngjørd á heimasíðuni hjá Tvøroyrar kommunu, er bindandi.

Meirilutin ráðførdi seg við Innlendismálaráðið, tá brævið varð skrivað.

Ein góð grundgeving skal til, um fundir skulu útsetast. Í hesum føri er eingin grundgeving yvirhøvur, sigur meirilutin. 

Hann heitti tí mánadagin á borgarstjóran og kommunustjóran um at áseta eina eyka býráðsfund sum skjótast.

Meirilutin ætlaði at fáa býráðsnevndirnar valdar av nýggum tann 29.desember. Men tað bar ikki til.

Tá segði Kristin Michelsen, borgarstjóri, at hann vísti ikki aftur ynskinum um nevndarval.

Málið verður viðgjørt á fyrstkomandi fundi í býráðnum tann 8.januar 2018, fekk borgarstjórin ført í gerðarbókina hjá býráðnum.

Tann fundurin varð útsettur. Nýggjur fundardagur er ikki ásettur.