Stjórnin kann ikki tryggja veddingarmilliónir

Hóast danski staturin eigur partafelagið Danske Spil, kann danska stjórnin ikki veita trygd fyri, at avtalan við P/f Ítróttarvedding heldur fram.

Avtalan ger, at Danske Spil kunnu selja síni spøl í Føroyum og lata milliónir krónur til millum annað ítróttin í Føroyum.

Nú ljóðar, at partur av Danske Spil skal seljast privatum.

Tí hevur Sjúrður Skaale, fólkatingsmaður, fingið Fíggjarnevndina í fólkatinginum at spyrja Kristian Jensen, fíggjarmálaráðharra, um ein møgulig søla fer at ávirka avtaluna millum Danske Spil og Ítróttarvedding.

Leggur seg ikki útí

Kristian Jensen svarar, at leiðslan og nevndin í Danske Spil avgera einsamallar, hvussu felagið verður rikið.

Danska stjórnin hevur ikki og vil heldur ikki hava nakra ávirkan á raksturin hjá Danske Spil. 

Sokallaða armslongdarprinsippið er galdandi fyri øll feløg, sum staturin eigur. 

Kristian Jensen sigur, at danska stjórnin kann ikki veita trygd fyri, at avtalan millum Danska Spil A/S og P/f Ítróttarvedding heldur fram, sama hvør eigur Danske Spil.