Mynstringin skal nú verða talgild. Lógin broytt

Umsitingin er broytt, og ikki minst er tøknin nógv broytt síðani 1988.

Tí er neyðugt at dagføra mynstringarlógina, heldur Vinnumálaráðið, sum hevur gjørt uppskot um nýggja lóg. 

Uppskotið er sent til hoyringar. 

Galdandi lóg er frá 1988, og kunngerðin um mynstring er frá 1994.

Nýggja lógin broytir ikki grundleggjandi ta gomlu. Talan er heldur um dagføring. 

Sama skylda 

Sambært lógaruppskotinum verður skyldan at mynstra framvegis galdandi.

Vinnumálaráðið sigur, at galdandi lóg er frá eini tíð, tá samskiftið við myndugleikar var við vanligum brøvum. Ella varð tøkni brúkt, sum ikki longur verður brúkt.

Nýggja lógin byggir á talgilt samskifti. Lógin krevur, at mynstringarlistarnir verða talgildir.

Talgilda skipanin er longu tikin í brúk, men mynstringarmyndugleikin hevur onga lógarheimild at krevja, at hon verður brúkt.

Hana fær hann við nýggju lógini.