Kunngerðin kom 1.juli, Váðaráðið ikki skipað enn

Tað dregur út at fáa Føroya váðaráð skipað.

Men úr Løgmansskrivstovuni verður sagt, at um 14 dagar verður kunngjørt, hvør verður í fyrsta ráðnum.

Váðaráðið er partur av lógini um Landsbankan. Tann parturin varð settur í gildi við kunngerð 1.juli í fjør.

Men enn er ráðið ikki skipað. 

Løgmaður velur limir í Føroya váðaráð eftir tilmælum.

Fimm fólk

Landsbankin hevur tilmæli um tveir fólk, Búskaparráðið eitt og landsstýriskvinnan í fíggjarmálum tilmælir tvey fólk í Váðaráðið.

Stjórin í Landsbankanum verður forkvinna í ráðnum.

Bíðað verður eftir innstillingini frá Búskaparráðnum, sigur landsstýriskvinnan í fíggjarmálum.

Føroya váðaráð skal tryggja, at føroyskir myndugleikar í góðari tíð fáa ávaringar um fíggjarligar váðar í samfelagnum, og tilmæli um átøk, sum kunnu fyribyrgja, at fíggjarligir váðar gerast til framtíðar fíggjarkreppur.

Føroya váðaráð fer at lata Skráseting Føroya, Tryggingareftirlitinum ella landsstýrinum tilmæli og ávaringar.

Føroya váðaráð skal eisini geva peningastovnunum í Føroyum ávaringar og tilmæli, hóast bankar og sparikassar í Føroyum eru danskt málsøki og tí eru undir danska váðaráðnum, Det Systemiske Risikoråd.