Umhvørvisstovan fingið átalu

Átalan er so álvarslig, at Umboðsmaðurin hevur kunnað formansskapin í løgtinginum, løgmann og landsstýriskvinnuna í Heilsu og innlendismálum um málið.

Byrjaði í 2016

Málið byrjaði 4. apríl 2016, tá ein kommuna sendi umsókn til Umhvørvisstovuna um marknaumskipan. 

Tá málið ikki varð avgreitt í oktober í fjør, kærdi tann, sum skal hava jørð frá matrikuleraða, til Løgtingsins umboðsmann.

Fólk hjá Umhvørvisstovuni hava verið á staðnum fimm ferðir í 2016 og tvær ferðir í fjør og gjørt uppmátingar. 

Málsviðgerðin ov drúgv

Umboðsmaðurin heldur tað ikki vera í lagi, at hvørki í journalskrásetingunum ella ferðauppgerðum hjá Umhvørvisstovuni ber til at staðfesta, um og nær uppmátingar eru gjørdar. 

Av tí at gongdin í málinum ikki er nóg væl skjalfest, kundi Umboðsmaðurin ikki meta, um umberandi orsøkir eru fyri drúgvu málsviðgerðartíðini. 

Men tað er alt annað enn gott, at málið framvegis ikki varð avgreitt skjótt tvey ár eftir, at Umhvørvisstovan fekk umsóknina. 

Málið er ikki stórt ella torgreitt at siggja til.

Tann 30. mars 2016 avgjørdi kommunan at keypa hjallin hjá klagaranum og í tí sambandi býta 15 fermetrar frá einum privatum matrikulnummari og leggja teir saman við ogn hjá kommununi.