Uttanríkisráðharrar fundast

Á skránni er føroyska ynskið at broyta uttanríkispolitisku lógina, verju- og trygdarpolitisk viðurskifti, føroyska umsóknin um limaskap í norðurlendska samstarvinum og sínámillum kunning.

Poul Michelsen, landsstýrismaður hevur fleiri ferðir alment fílst á, at Føroyar ikki fáa kunning á trygdarpolitiska økinum. Seinast tá kreppa var millum vestanlond og Russland, tá ein fyrrverandi russiskur njósnari og dóttir hansara vóru eitrað í bretska býnum Salisbury.

Vestanlond - eisini Danmark - søgdu, at Russland hevði ábyrgdina av atsóknini, og mong russisk sendifólk vórðu útvíst. Men Poul Michelsen, landsstýrismaður, segði, at Føroyar ikki kundu taka støðu í málinum, tí vit høvdu ongar upplýsingar, sum ein støða kundi byggjast á. 

Klokkan 10:30 verður tíðindafundur í Tinganesi. Eftir tíðindafundin fer Anders Samuelsen í Løgtingsins uttanlandsnevnd.

Anders Samuelsen, uttanríkisráðharri, fer aftur til Danmarkar í kvøld.