Grikkaland og Makedónia skrivað undir avtalu

Uttanríkisráðharrarnir í Grikkalandi og Makedónia hava skrivað undir eina avtalu, sum skal loysa eitt gamalt stríð um rættin at brúka navnið Makedónia.

Skrivað varð undir avtaluna í gjár, og hon ásetir, at Makedónia nú skal eita Lýðveldið Norðurmakedónia, skrivar Reuters.

Stríðið um navnið hevur vart síðani borgarakríggið í Jugoslavia, sum var.

Makedónia var eitt av teimum seks lýðveldunum í Jugoslavia, men í 1991 tók Makedónia loysing.

Ein landspartur har norðuri í Grikkalandi eitur eisini Makedónia, og grikkar hava verið ímóti, at fyrrverandi jugoslaviska lýðveldið eisini tók sær hetta navnið.

Stríðið hevur havt við sær, at Grikkaland hevur verið ímóti, at Makedónia sleppur upp í Nato og ES.

Hóast uttanríkisráðharrarnir í báðum londum skrivaðu undir avtaluna í gjár, eru allar súðir ikki syftar enn, tí tjóðartingini í báðum londum skulu eisini góðkenna avtaluna, og fólkaatkvøða skal vera í Makedónina og nýggja navnið.