Tríggir ráðharrar í bretsku stjórnini hava lagt frá sær

Tríggir ráðharrar hava nú tikið seg úr bretsku stjórnini, í kjalarvørrinum á vánaliga valinum hjá Labour í síðstu viku.

Og forsætisráðharrin, Keir Starmer, er undir stórum trýsti at leggja frá sær.

Triði ráðharrin, Alex Davies Jones, hevur boðað frá, at hon leggur sessin frá sær. Tað skrivar hon á sosiala miðilinum X, sambært the Guardian.

Frammanundan hava Jess Phillips og Miatta FahnBulleh lagt frá sær sum raðharrar.

Starmer heldur fram

Hóast vaksandi trýstið, hevur skrivstovan hjá bretska forsætisráðharranum boðað frá, at Starmer heldur fram í starvinum.

Meira enn 80 tingfólk fyri Labour hava heitt á Starmer um at leggja frá sær, skrivar bretska kringvarpið, BBC.

Flokkurin misti okkurt um 1.500 sessir í bretsku lokalráðnum. Flokkurin misti valdið í Wales og fekk vánaligasta úrslitið í Skotlandi higartil, skrivar BBC.

Keir Starmer var í andróðri fyrr í ár í Mandelson-málinum, eftir at hann í februar í fjør tilnevndi Peter Mandelson bretskan sendiharra í USA. 

Mandelson hevði havt tætt samband við dømda kynsbrotsmannin, Jeffrey Epstein.