Vil hava fleiri el-bilar

Sirið Stenberg, landsstýriskvinna, vil hava lógina, sum sleppir el-bilum undan skrásetingar-, meirvirðis- og umhvørvisgjaldi, longda í minsta lagi eitt ár aftrat.

62 el-bilar skrásettir í Føroyum, men fyri lógarbroytingina vóru bara 10 el-bilar skrásettir.

- Ein orsøk til, at fólk kanska aftra seg við at keypa el-bil, er, at teir sleppa undan gjøldum bara í ár, men tað skal broytast, sigur Sirið Stenberg við Dimmalætting.

Hon fer fyrsta dagin at heita á Fíggjarmálaráðið um at leingja frítøkuna av hesum gjøldum í minsta lagi eitt ár aftrat.

Ætlanin er eisini at leggja uppskotið um at broyta elveitingarlógina framaftur, tá tingið kemur saman á ólavsøku.

Tað datt burtur í farnu tingsetu.

Sambært uppskotinum fær SEV heimild at áseta ein serligan elprís fyri at løða el-bilar um kvøldið og um náttina.