Sparikassi minni avlop fyrra hálvár enn í fjør

Norðoya sparikassi væntar 12 til 15 milliónir kr. í avlopi fyri skatt í 2018.

Í fjør varð væntað, at avlopið bleiv 14 mió. kr.

Úrslitið fyrra hálvárið í ár var fimm milliónir krónur - tað var eftir skatt.

Fyrra hálvár í fjør var úrslitið betri. Tá var tað stívar átta milliónir krónur.

Orsøkin til afturgongdina er, at Sparikassin noyddist at niðurskriva fastognir 3,2 mió. kr. eftir boðum frá Fíggjareftirlitinum. 

Niðurskriving

Millum annað bleiv høvuðssæti Sparikassans í Klaksvík niðurskrivað 2,7 mió. kr.

Harafturat kravdi Fíggjareftirlitið, at Sparikassin skrivaði niður útlán 1,8 mió. kr.

Innlánsavlopið hjá Norðoya sparikassa var 397 mió. kr. 30. juni í ár. 

Norðoya sparikassi hevur seinastu árini merkt stóran áhuga fyri at seta pening í ábyrgdarfæ. Rentan er fimm prosent.

Ábyrgdarfæ

Ábyrgdarfæið var yvir 20 mió. kr. tann 30.juni.

Ábyrgdarpeningur er váðafúsur peningur, sum Innskjótara­grunnurin ikki umfatar. 

Ábyrgdarpeningur kemur eftir alla aðra skuld í Sparikassanum og heftir fyri skyldur Sparikassans.

Ábyrgdarfæið hjá Norðoya sparkikassa vaks 1,7 prosent fyrra hálvárið í ár.