- Tíðindi, mentan og ítróttur
Andstøðan vil framskunda tunlarnar norður um Fjall
![](https://kvf.fo/sites/default/files/styles/grein-ovasta-mynd/public/nordur_um_fjall.jpg?itok=IUgI3eTU)
Andstøðan skjýtur nú upp at framskunda verkætlanina við tunlunum norður um Fjall. Andstøðan vil, at fíggingin av tunlunum norður um Fjall verður lutvíst knýtt at Norðoyatunlinum.
Tað krevur, at verklagslógin fyri Norðoyatunnilin verður broytt, tí felagið hevur eina bundna uppgávu bara at byggja og reka Norðoyatunnilin.
Fólkaflokkurin, Sambandsflokkurin, Sjálvstýri og Miðflokkurin vilja, at partafelagið Norðoyatunnilin fær rætt til at fyrireika og forprojektera vegagerðina og tunnilsgerðina millum Klaksvík og Árnafjørð, og millum Árnafjørð og Norðtoftir.
Landsverk skal undir ábyrgd mótvegis landsstýrismanninum góðkenna fyrireikingarnar og forprojekteringsarbeiðið.
Stendur Norðoyatunnilin sum byggiharri fyri tunlarnar norður um Fjall, kann arbeiðið byrja uttan stórvegis drál, heldur andstøðan.
Ger landið eina tunnilsverkætlan gjøgnum eitt alment partafelag, verður ikki neyðugt at spreingja fíggjarkarmin, heldur andstøðan.
Løguætlanin hjá landinum leggur annars upp til, at farið verður undir nýggjar tunlar norður um Fjall um umleið fýra ár.
Andstøðan heldur ikki, at tað er ráðiligt at bíða so leingi.
Trygdin í tunlunum er ikki nóg góð, tað er óhøgligt at ferðast í tunlunum, og verandi tunlar gera, at tað ber ikki til at menna vinnulívið í økinum norðan fyri Fjall, sigur andstøðan.