Prísmunurin á húsum í og uttanfyri Tórshavn minkar

Prísmunurin millum hús í Havn og hús uttanfyri Havnina minkar í ár.

Orsøkin er, at húsaprísirnir uttanfyri Havnina gera eitt lutfalsliga størri lop uppeftir í ár, enn húsaprísirni í Havn.

Tað sæst í heystfrágreiðingi, sum Búskaparráðið legði fram í gjár. 

Hetta skal tó takast við tí fyrivarni, at íbúðarprísir ikki eru við í yvirlitinum, og prísurin á íbúðum í Tórshavn er vaksin lutfalsliga meira enn prísurin á sethúsum, skrivar Búskaparráðið.

Frá 2006 fram til 2016 hevur munurin á prísinum millum hús í Havn og uttan fyri Havnina svingað millum 1 og 1,2 milliónir krónur, men í 2016 gjørdu húsaprísnir í Havn eitt lop, og tá fór prísmunurin upp um 1,5 milliónir. 

Í 2017 var prísmunurin áleið 1,6 milliónir, men higartil í ár er hann altso minkaður aftur til áleið 1,5 millión.

Prísirnir á húsum í Tórshavn hava verið vaksandi síðan 2012, og teir eru nú á væl hægri støði enn prísirnir í 2007 - stutt áðrenn kreppuna. Húsaprísirnir uttanfyri Havnina eru við hesum prísvøkstrinum, vit nú síggja, eisini hægri, enn teir vóru í 2007.