Modric besti spælari í heiminum

Í tíggju ár á rað hevur antin portugisiski Christiano Ronaldo ella argentinski Lionel Messi fingið heiðurin at vera kosin heimsins besti fótbóltsspælari.

Men vinnarin í ár er kroatiski Luka Modric. Tað var greitt í gjárskvøldið á hátíðarhaldi í Paris, har 30 leikarar vóru uppstillaðir.

33 ára gamli Modric hevði eina framúr góða HM kapping í Russlandi í summar, tá ið Kroatia kom í finaluna.

Frammanundan hevði hann vunnið í Champions League kappingina fyri triðju ferð á rað við felagnum Real Madrid.

Norska Ada Hegerberg varð kosin besti kvinnuligi leikari í 2018 og 19 ára gamli fraklendingurin Kylian Mbappe var kosin besti leikari hjá monnum undir 21 ár.