Danskar milliónir til ung í ríkisfelagsskapinum

Ung í Føroyum skulu vita meira um Danmark og Grønland.

Forsætismálaráðíð hevur sett av 25 mió. kr. næstu fýra árini til at styrkja kunnleikan hjá teimum ungu í ríkisfelagsskapinum um hini bæði londini í ríkinum. 

Hetta varð samtykt á ríkisfundinum í Føroyum í summar.

Og semja er nú gjørd um pengarnar í fólkatinginum. Teir koma í donsku fíggjarlógina fyri 2019.

Pengarnir skulu brúkast til námsferðir, stuðul til ung, sum fara í háskúla, heimildarfilmar, útbúgving og til kappingar um serritgerðir í hægri útbúgvingum.

Danska stjórnin fer eisini at royna at fáa kunnleika um ríkisfelagsskapin í danska fólkaskúlan, har kunnleiki um ríkisfelagsskapin skal verða kravdur. 

- Við vitan gera vit av við fordómarnar og styrkja samanhaldið, sigur Lars Løkke Rasmussen, forsætisráðharri.