Fingu 200 tons afturat frá Noregi

Føroyar hava fingið 200 tons av botnfiski afturat í norskum sjógvi næsta ár.

Føroyar og Noreg eru vorðin samd um sínámillum fiskiveiðirættindi í 2019. 

Annars eru bara smávegis broytingar samanborið við í ár. 

Føroysk skip sleppa at fiska 4.610 tons av toski, 1.075 tons av hýsu, 500 tons av upsa og 400 tons av øðrum fiskasløgum í norskum sjógvi í 2019. 

Sleppa í norskan sjógv eftir russiskum fiski 

Harumframt sleppa føroysk skip at fiska 3.450 tons av toski og 300 tons av hýsu, sum eru í sáttmálanum við Russland, í norskum sjógvi.

Norsk skip hava fingið 220 tons av blálongu og brosmu afturat í føroyskum sjógvi, men 50 tons minni av upsa.

Norska makrelkvotan í føroyskum sjógvi í 2019 verður óbroytt, 5.979 tons.

Men norsk skip sleppa at fiska 30.000 tons av svartkjafti í føroyskum sjógvi í 2019. Tað eru 2.640 tons minni enn í ár.