Strika kanning av niðurskotnum forsetaflogfari

Franskir dómarar hava steðgað drúgvu kanningini av tilburðinum, tá eitt flogfar við forsetanum í Rwanda umborð varð skotið niður í 1994. Tað skrivar BBC.

Deyði forsetans - forsetin æt Juvenal Habyarimana - útloysti fólkamorðið í Rwanda, har meira enn 800.000 fólk vórðu dripin.

Fýra ár eftir tilburðin settu fraklendingar eina kanning í verk, eftir at familjulimir hjá fronsku manningini, sum eisini doyði, høvdu biðið um tað.

Ein av dómarunum skuldsetti Tutsi-uppreistrarfólk undir leiðslu av núverandi forsetanum í Rwanda, Paul Kaggame, fyri álopið, og boð vórðu givin um at handtaka fleiri av hansara tættastu samstarvsfeløgum.

Men nú - beint fyri jól - vórðu skuldsetingarnar tiknar aftur, tí nóg góð prógv ikki vóru.

Sakførarar hjá einkjuni eftir fyrrverandi forsetan, sum lat lív í álopinum í 1994, siga við AFP, at grundin til, at kanningin nú verður steðgað, er politisk.

- Hendan avgerðin hjá fronsku dómarunum er eitt slag av resignatión, tí ákærarnir ikki hava dugað at fingist við politiska bakstøðið í málinum, sigur Philippe Meilhac við AFP.