Føroyskt handverk søkt um altjóða limaskap

Føroyar hava søkt um limaskap í altjóða felagsskapinum WorldSkills Europe. 

Føroya handverksmeistarafelag hevur tikið stig til at søkja um limaskapin og skal umboða Føroyar í felagsskapinum, um Føroyar fáa limaskap.

WorldSkills Europe er áhugafelagsskapur, sum hevur til endamáls at styrkja og vekja áhugan fyri dygdargóðum handverki og yrkisútbúgvingum á høgum førleikastigi.

Endamálið er við faklærdum úrmælingum at gera heimin betri, sigur Mentamálaráðið.

WorldSkills Europe skipar annaðhvørt ár fyri EuroSkills-kapping, sum er evropeiska meistaraheitið fyri ung úrvalsfakfólk, sum kappast um at gerast evropameistari í sínum fakøki.