Skála nýtt oddalið

Skála vann í dag fjórða dystin á rað, og nú eru teir á odda í landskappingini.

Í dag var Skála á vitjan hjá ÍF í Fuglafirði, og har vóru skálamenn greitt omaná.

Skála vann 3-0, hálvleiksstøðan var 2-0.

Skála tapti í fyrsta umfari 0-1 fyri B36, men síðan tá, hevur Skála vunnið fýra dystir á rað.

Tað er merkisvert, at í hesum fýra dystinum, hevur Skála einki mál latið inn.

Telur ein dystin í fyrsta umfari í kappingini um Løgmanssteypið við, sum Skála vann 1-0 á AB, er talan um fimm dystir.

Tað er eisini vert at leggja tilmerkis, at í hesum fýra dystunum hevur Skála verið greitt tað betra liðið.

Gongdin síðstu fýra dystirnar hjá Skála

B36 var undan hesum umfarinum oddalið, men dysturin hjá teimum í Gøtu ímóti Víkingi bleiv avlýstur vegna veður.

Sigurin hjá Skála á ÍF í dag hevur við sær, at teir eru farnir upp um B36 á stigatalvuni við betur málmuni.

TB tók stig frá føroyameistaranum

TB telist eisini millum feløgini, sum hava klárað seg væl í fyrstu umførunum.

TB spældi í dag 1-1 javnleik ímóti føroyameistaranum HB, sum hevur fingið eina vánaliga byrjan.

TB er í løtuni á fjórða plássi við átta stigum, meðan HB er á sætta plássi við bara seks stigum fyri fyrstu fimm umførini

EB/Streymur fekk fyrsta sigurin

Gleðin var stór á Eiði í dag, tá EB/Streymur fekk fyrstu stigini á kontuna, og tað eisini við maner.

Sundalagsmenn vunnu heili 5-1 á AB.

Eisini var hugaligt hjá EB/Streymi, at Arnbjørn Hansen tykist at hava funnið máltevið. Hann skoraði tvær ferðir í dag.

KÍ bjóðar av

Stóra avbjóðingin hjá KÍ undan hesum kappingarárinum var, at nógvar útskiftingar vóru í hópinum.

Tá hugsað verður um tað, má sigast, at klaksvíkingar hava fingið eina sera góða byrjan upp á kappingina.

Í dag vann KÍ 2-0 á NSÍ. Sigurin var hin triðji á rað, og saman við tveimum javnleikum tekur tað KÍ upp á 11 stig, sum er eitt minni enn Skála og B36 hava á fyrsta og øðrum plássi.

KÍ fer tó at iðra seg um, at Patrik Johannesen bleiv útvístur fyri tvey gul kort. Hann verður tí ikki við ímóti B36 hósdagin í Gundadali.

KÍ-NSÍ 2-0 (2-0)

ÍF-Skála 0-3 (0-2)

TB-HB 1-1 (0-0)

EB/Streymur-AB 5-1 (2-1)

Støðan

6. umfar verður spælt skírisdag 18. apríl