Hanus: Vil til størri og fínari adressur

 - Hetta er tað sama, sum til allar hinar dystirnar. Tað er nakað lort.

Soleiðis tók Hanus Sørensen saman um fjórða Nations League-dystin, har Føroyar mistu eina 2-0 leiðslu og í staðin spældu javnt 2-2 í Astana.

Hanus Sørensen telist millum teir, sum hava spælt mest hesar fýra dystirnar, men hann heldur ikki, at møði skal vera nøkurm umbering. 

 - Tú ert vanur við at spæla triðja hvønn dag, og hatta har við, at hetta skal vera tað sjúkasta nakrantíð... tað eru fólk, sum eru í kríggi og berjast fyri øðrum. Tað er tað harða. Vit slappa av, fara út at venja, og so slappa vit av aftur. At spæla fýra dystir upp á nakrar dagar, tað eiga vit at klára, segði Hanus Sørensen.

Miðvallarin hevur sáttmála við slovenska felagið Celje, men er útleigaðu til NK Aluminij, sum í løtuni liggur nummar fimm í bestu slovensku deildini, men Hanus Sørensen dylir ikki fyri, at hann kundi hugsað sær okkurt størri og betri.

 - Eg haldi, at onkur má koma í gongd við at hiva meg á eina størri adressu, tí eg haldi, at eg ferð eftir ferð vísi, at eg kann spæla á øgiliga høgum stigi, sigur Hanus Sørensen.