Samferðslumálaráðið givið tænastuboð

Samferðslumálaráðið hevur givið Landsverki tænastuboð um, at ongar nýggjar byggiverkætlanir við Landsverki sum byggiharra skulu setast í gongd uttan at tær eru góðkendar av Samferðslumálaráðnum.

Í telduposti frá Samferðslumálaráðnum til øll aðalráðini 15. apríl, tað vil siga í gjár, stendur:

"Hjálagt verður til kunningar sent avrit av tænastuboðum, sum í dag er sent Landsverki."

Undir yvirskriftini "Tænastuboð." stendur í teldupostinum frá Samferðslumálaráðnum, sum Kringvarpið hevur fingið innlit í.

"Í fráboðan dagfest tann 22. januar 2019 boðaði Samferðslumálaráðið frá, at ongar nýggjar byggiverkætlanir við Landsverki sum byggiharra verða settar í gongd fyribils, og at hetta var galdandi til nýggj boð komu úr Samferðslumálaráðnum.

Samferðslumálaráðið skal við hesum boða frá, at ongar nýggjar byggiverkætlanir við Landsverki sum byggiharra verða settar í gongd, uttan at hesar fyrst eru góðkendar av Samferðslumálaráðnum."