Pubbin letur upp aftur

Pubbin læt aftur fríggjadagin 3.mai. Og 31.mai, tá mentanarnátt er á Tvøroyri, er seinasta tiltakið á Seglloftinum. 

Tað er ikki Anna Kirstin Thomsen, sum hevur rikið Pubbina og Seglloftið, sum hevur avgjørt at lata aftur.

Óli Restorff Hansen, sum umboðar eigararnar í Havn, vil ikki gera stórvegis viðmerkingar um málið.

Vil ikki siga nógv 

Hann vil heldur ikki siga, um afturlatingin hevur samband við búgvið eftir Poul Hansen, sum doyði herfyri. Óli Restorff Hansen sigur bara, at arbeitt verður við málinum. Men Pubbin letur upp aftur, sigur hann.

Anna Kirsten Thomsen fegnast um í Facebook bólkinum hjá Pubbini og Seglloftinum, at tað eydnaðist beiggja hennara og øðrum at fáa friðað bygningarnar og fiskaplássið og fingu umvælt Pubbina og Seglloftið soleiðis, at tey nú eru millum hugnaligastu høli í landinum. 

Hon sigur seg vóna, at virksemið heldur fram undir aðrari leiðslu, tí hesir bygningar eru upprunin til Tvøroyri og her hevur altíð ýtt av lívi. Tað hevði verið stórt spell, um teir nú fara at standa myrkir og tómir eftir 183 árum, sigur Anna Kirstin Thomsen.