Útlendingar skulu læra føroyskt fyri at vera her

Útlendingar, sum koma til Føroya at búgva, skulu hava lokið prógv á einum føroyskum mál- og samfelagsskeiði fyri at fáa varandi uppihaldsloyvi her. 

Tað er ætlanin, nú ein politikkur um tilflytarar verður fyrireikaður.

Og hetta var eitt høvuðstilmæli í integrasjónsálitinum frá 2011.

Poul Michelsen, landsstýrismaður, hevur svarað spurningum frá Kristionnu Winther Poulsen, løgtingskvinnu.

Hon spurdi um arbeiðið við integrasjónini í Føroyum.

Semja við Danmark 

Í vetur fekst semja við donsku stjórnina um at flyta ein stóran part av umsitingini av uppihaldsloyvum í útlendingalógini á føroyskar hendur. 

Í avtaluni við danir varð ásett, at føroyskir myndugleikar í løgtingslógini um integrasjón kunnu seta sum treyt fyri at fáa varandi uppihaldsloyvi í Føroyum, at útlendingar hava tætt tilknýti til Føroyar.

Tey skulu tí lúka málslig krøv og hava innlit í føroyska mentan og samfelagslig rættindi og skyldur.

Poul Michelsen sigur, at arbeiðsgevarar eiga eisini at tryggja, at integrasjónin í Føroyum riggar.

Hann sigur, at ein yvirskipað integrasjónslóggáva fer ikki einsamøll at loysa avbjóðingarnar. 

Integrasjón er eisini á arbeiðsmarknaðinum, í grannalagnum og í øðrum felagskapum.