Partafelag skal krevja gjald í fýra tunlum

Innkrevjingin hjá øllum undirsjóvartunlunum er nú í einum partafelagi, P/f Tunnil, sum varð stovnað 28. juni.

P/F Norðoyatunnilin, P/F Eystur- og Sandoyartunlar og P/F Vágatunnilin stovnaðu nýggja felagið við 510.000 krónum í partapeningi.

Nýggja partafelagið hevur heimstað á Heiðavegi í Saltangará, hagar Norðoyatunnilin og Vágatunnilin flyta úr Havn.

Í nevndini í P/f Tunli eru Teitur Samuelsen í Havn, hann er formaður, Marita Suanna Hentze á Argjum og Dánial Tummas Thomsen í Sandavági.

Uni Danielsen í Hoyvík er stjóri.

Endamálið hjá nýggja felagnum er at krevja inn pengar fyri at brúka teir fýra undirsjávartunlarnar.

Felagið kann eisini umsita innkrevjing fyri onnur feløg og stovnar, bæði privat og almenn.