Fyrst upp og so søkkjast aftur longri úti

Vágs kommuna hevur fingið loyvi frá Umhvørvisstovuni til at søkkja tilfar á streymasjógvi úti fyri Vágsfjørð, tilfar, sum verður tikið upp, nú havnin í Vági skal reinsast og dýpast.

Ætlanin er, at havnin skal verða átta metrar djúp. 

Roknað verður við, at 1.000 rúmmetrar av sandi og leysum tilfari verða tiknir upp í Vágs havn.

Seinast, loyvi varð givið Vágs kommunu til aftursøkking, sum slíkt eitur, var í 2006.

Hóast havbotnurin við bedingina er sera illa dálkaður, er tó talan um so smáar nøgdir og avmarkað øki, at loyvi er givið at søkja tilfarið haðani.

Umhvørvisstovan sigur í loyvinum, at er tað gjørligt, skal nytta fáast burtur úr tilfarinum, til dømis um tað kann brúkast til útfylling, so sum minst verður søkt. 

Aftursøkkingin kann tó ikki byrja, fyrr enn freistin at kæra avgerðina hjá Umhvørvisstovuni er farin 7.august.