Kravdi nevndarlim fyri lán

Tað var eitt krav frá partaeigaranum, sum lænti Atlantic Petreolum upp til fimm milliónir krónur til raksturin herfyri, at partaeigarin slapp at velja ein nevndarlim.

Tað gjørdist Ben Arabo.

Hetta hevði so eisini tað við sær, at ein teirra, sum var í nevndini, noyddist úr henni.

Semja varð um, at formaðurin í nevndini, danin Henrik Olesen, fór úr nevndini.

Hinir báðir í nevndini vóru bretin Charles Hendry og Yves Paletta í Kanada.

Teir stóðu fyri vali á eykaaðalfundinum hjá Atlantic Petroleum fyrrapartin í gjár.

Skotnir upp á eykaaðalfundin

Men á eykaaðalfundinum hendi tað, at partaeigarar skutu upp at velja Kaj Johannesen og Mourits Joensen í nevndina.

Og teir blivu einmælt valdir. Tað bleiv Ben Arabo eisini.

Nú eru so bara føroyingar í nevndini hjá Atlantic Petroleum. Har vóru bara útlendingar.

Ben Arabo er nú nevndarformaður og Kaj Johannesen næstformaður.

Stórt partafelag

Ben Arabo var stjóri í Atlantic Petroleum í sjey ár.

7.400 partaeigarar í yvir 30 londum eru í Atlantic Petroleum. Meiriluti teirra er í Føroyum og í Danmark.

Í Atlantic Petroleum eru tríggjar milliónir og 697.860 partabrøv.

Eingin partaeigari eigur meira enn fimm prosent, uttan Betri banki og Betri samtakið, sum saman eiga 5,4 prosent.