Kemur fyrst í september

Havrannsóknarskipið kemur til Føroya fyrst í september. Sambært Havrannsóknarstovuni kemur skrokkurin úr Litava til Føroya mikudagin 4. september.

Í mai 2017 skrivaðu Fiskimálaráðið og skipasmiðjan MEST undir sáttmála um at byggja rannsóknarskip. MEST fekk síðani Western Baltic Shipyard í Litava at gera skrokkin. 

Mett at kosta 300 milliónir

Skrokkurin verður sjósettur leygardagin 31. august. Síðani verður hann sleipaður til Føroya, og skipið verður gjørt liðugt á Skála.

Skipið skal verða liðugt næsta summar. Havrannsóknarskipið er mett at kosta 300 milliónir krónur. Tá er studningurin úr landskassanum taldur við.

Sambært lóg um studning til skipasmiðjur eiga skipasmiðjur at fáa átta prosent av sáttmálaprísinum í stuðli til skipasmíð.