Mótstøðufør bakteria spjatt seg

Bakterian, MRSA, er vorðin mótstøðufør móti nøkrum sløgum av antibiotika, men nú er nýtt slag av mótstøðuførari bakteriu nú staðfest á øllum sjúkrahúsum í Danmark.  

Bakterian eitur van-comycin-restistentir entero-kokkar, - stytt VRE. 

Eftir fáum árum hevur hon spjatt seg frá einum sjúkrahúsi í Danmark til sjúkrahús í øllum landinum.

Tvífaldað

- Vit hava greitt sæð, at talið av sjúklingum, sum hava fingið ígerðarsjúku við hesi bakteriuni er vaksið seinastu fimm árini, sigur Robert Skov, deildarlækni á deildini fyri antibiotika-resistens hjá Statens Serum Institut, við JyllandsPosten. 

Í 2013 varð bakterian staðfest hjá 227 sjúklingum. Í 2018 var talið meira enn tvífaldað til tilsamans 525 sjúklingar.

- Trupulleikin er, at vit hava sera fá sløg av antibiotika at viðgerða ígerðir við hesi bakteriuni, sigur Robert Skov.

Tú kanst gott vera berari av sjúkuni og ikki verða sjúkur. Men fyri veikastu sjúklingarnar kann bakterian verða sera vandamikil, - serliga tey, sum hava veika immunverju, skrivar JyllandsPosturin.