Mærsk sleppur sær av við oljuna

Skipaflotin er nógv tann mest dálkandi í føroyska co2-roknskapinum, men hetta er ikki nakað eindømi. Skipaferðslan yvirhøvur dálkar serstakliga illa, men heimsins størsta reiðarí, Mærsk Line, hevur sett sær fyri at vera co2-neutralt í 2050.

Danska reiðaríið er farið undir fyrireikingarnar, og í samrøðu við danska blaðið Berlingske Tidende sigur umhvørvisstjórin hjá felagnum, John Kornerup-Bang, at Mærsk nú hevur valt trý sløg av brennievni, sum tey vænta kunnu avloysa oljuna. Fleiri sløg eru kannaði og vrakaði, millum annað vetni. Tey trý brennievnini felagið hevur valt at satsa upp á eru ethanol, biogass og ammoniak.