Yvirtøka viðgjørd í fólkatinginum

Føroyanevndin hjá fólkatinginum hevur nú fingið uppskotið um at lata heimastýrið umsita ávís útlendingamál. Uppskotið varð viðgjørt í fólkatinginum í gjár.

Hetta er aðru ferð, uppskotið er í fólkatinginum. Tað varð lagt fram í farnu tingsetu, men datt burtur, tá val varð skrivað út. Ætlanin er, at føroyingar yvirtaka ein part av útlendingarmálunum á nýggjárinum.

Løgtingið hevur samtykt yvirtøkuna. Sambært henni skulu føroyingar gera av í ávísum førum, hvørjir útlendingar sleppa at vera í Føroyum. Umsitingin í hesum málum verður føroysk. 

Udlændingenævnet í Danmark verður kærumyndugleiki. Føroyanevndin skal í seinasta lagi skriva álit 28. november. Tá fyrsta viðgerð var í fólkatinginum í gjár, fekk uppskotið góða undirtøku.