USA ongar ætlanir um at taka seg úr Irak

USA hevur ongar ætlanir um at taka seg úr Irak. Tað sigur amerikanski verjumálaráðharrin, Mark Esper, við Reuters-tíðindastovuna

Hetta sigur hann, eftir at upplýsingar um at ætlanir at taka seg úr Irak, eru komnir fram í einum brævi. Men amerikanski verjumálaráðharrin avsannar harvið hesar upplýsingar. 

Brævið við upplýsingunum um, at londini fara úr Irak, stavar frá amerikonskum keldum, sigur irakiski herurin, sambært bæði Reuters og AFP, men nú sigur amerikanski verjumálaráðharrin, at brævið er falskt. 

Royna at finna útav, hvaðani bræv stavar

– Eg veit ikki, hvat hetta er fyri eitt bræv. Vit royna at finna útav, hvaðani tað stavar, og hvat tað er fyri nakað. Men ongin avgerð er tikin um at fara úr Irak. Punktum, sigur Mark Esper við Ritzau. 

Mark Milley, amerikanskur herleiðslustjóri, sigur við fleiri miðlar, at talan er um eitt veruligt bræv, men at tað av misgávum varð sent. 

– Brævið er illa skrivað, og tað gevur ábendingar um ætlanir at taka okkum aftur. Men tað er ikki tað, sum gongur fyri seg, sigur hann við millum annað Reuters og AFP. Tað stendur ikki í brævinum, nær amerikanski herurin ætlar at taka seg úr Irak.