Jóhan á Plógv Hansen verður við móti Íslandi

Nú er greitt, at Jóhan á Plógv Hansen verður við, tá danska hondbóltslandsliðið spælir fyrsta dystin í EM-endaspælinum móti Íslandi.

Kappingarneyti hansara á høgra vongi, Lasse Svan, er skaddur og ásannar, at hann ikki verður førur fyri at spæla leygardagin.

Lasse Svan hevur trupulleikar við bæði økslini og legginum.

Vandi ikki fyrrapartin

Lasse Svan vandi ikki við danska landsliðnum í Frederiksberg fyrrapartin í dag. Hann veit heldur ikki at siga, nær hann verður tøkur aftur, men hann er bjartskygdur, tí skaðin í legginum ikki er so álvarsamur, og tað gongur somuleiðis rætta vegin við økslini, skrivar TV2.dk.

Fríggjadagin fer danska ferðalagið til Svøríkis, har EM-endaspælið er.

Fríggjakvøldið klokkan sjey skal landsliðsvenjarin hava boða frá, hvørjar leikarar hann vil hava skrásettar til endaspælið. 

Men nú greitt er, at Lasse Svan ikki verður tøkur til fyrsta dystin, hevur landsliðsvenjarin boðað frá, at Jóhan á Plógv Hansen verður við.