Ungdómstingið fer at viðgera 12 uppskot

12 uppskot koma til viðgerðar á ungdómstinginum mánadagin og týsdagin.

Uppskot eru m.a. um at seta forboð fyri einnýtisplasti, at banna innflutningi av vørum, sum ikki eru góðkendar í ES, at banna matoyðsli, at lækka aldurin fyri at taka koyrikort niður í 17 ár, og at lækka valrættaraldurin úr 18 niður í 16 ár.

Undirtøkan til ungdómstingið hevur ikki verið størri enn hesaferð.

Níggju skúlaflokkar hava boðað frá, at teir verða við. 

Næmingar í 8.flokki, 9.flokki ella 10.flokki eru bodnir at manna ungdómstingið.

Avlýst í fyrraárið

Ungdómsting skuldi vera í 2018, men tað varð av ongum, tí ov fáar tilmeldingar vóru.

Seks ungdómsting hava verið. Seinast var í 2016. Tá vóru seks skúlaflokkar við.  

Tey 32 ungdómstingfólkini viðgjørdu tá 12 lógaruppskot, átta uppskot vórðu samtykt, og fýra vórðu feld.

Innlit í fólkaræði

Endamálið við ungdómstinginum er at geva næmingum størri innlit í fólkaræði, at lata teir vera ein virknari part av fólkaræðinum, og geva teimum innlit í, hvat luturin hjá løgtinginum er í fólkaræðinum.

Løgtingsformaðurin setir ungdómstingið mánadagin klokkan tíggju.

Ungu politikarnir sleppa eisini at seta løgmanni og landsstýrisfólkunum ófráboðaðar spurningar.