Talið veksur framvegis

Nú hava tilsamans 3.804 fólk í Føroyum fingið játtað serliga korona-lønarískoytið. Tað vísa nýggjastu tølini hjá Arbeiðsloysisskipanini.

Tá skipanin við lønarískoytinum byrjaði, vóru tað væl fleiri kvinnur enn menn, sum fingu játtað lønarískoytið, men soleiðis er ikki nú.

Nú er javnvág í tølunum og kynunum. Nú hava 1.902 kvinnur fingið játtað lønarískoytið, og somuleiðis eisini 1.902 menn, sambært tølunum.

Serliga korona-lønarískoytið er í mesta lagi 20.000 krónur um mánaðin. Útgoldna upphæddin verður tillagað eftir, hvussu nógvir dagar eru í einum mánaði.