Kanna 300 ferðafólk á Norrønu

300 av teimum 460 ferðafólkunum, sum koma við Norrønu inn á Seyðisfjørð í Íslandi í dag, skulu potast fyri koronu, tá tey koma í land.

Seinast, Norrøna kom til Íslands, vórðu potingarnar gjørdar umborð á skipinum. Men hesaferð hava eingi heilsustarvsfólk verið við á túrinum og avgreitt podingarnar, áðrenn Norrøna kemur til lands, skrivar íslendska kringvarpið.

Hin 160 ferðafólkini koma beinleiðis úr Føroyum. 

Grønland og Føroyar eru einastu øki, sum smittumyndugleikarnir í Íslandi lýsa sum IKKI-smittuøki.

Kanna fólk á bryggjuni

Smittuverjumyndugleikin á norðureystur-landinum í Íslandi hevur boðað frá, at frá í næstu viku, tá Norrøna fer undir summarsigling, verða ferðafólkini kannað á bryggjuni

Rúni Vang Poulsen, stjóri í Smyril Line, sigur við útvarpið, at felagið tryggjar sær, at ferðafólkini eru frísk og ikki hava fepur, tá tey koma umborð, og at tey ikki hava verið í sambandi við sjúk fólk.

Í Danmark verða ferðafólk, sum skulu við Norrønu, kannað á bryggjuni, og úrslitið av potingini er greitt, áðrenn tey skulu í land aftur.