Kanning: Ferðafólk skulu sjálvi gjalda

Tað vísir ein spurnakanning, sum spyr.fo hevur gjørt fyri Kringvarpið.

56 prosent av teimum spurdu halda, at ferðafólkini sjálvi skulu gjalda fyri koronukanningana, tá tey koma til Føroya við antin flogfari ella ferðamannaskipi.

33 prosent av teimum spurdu í kanningini halda, at landskassin skal gjalda fyri kanningina, meðan 11 prosent siga seg ikki vita, hvør skal gjalda.

90 prosent: Øll skulu kannast

Í øllum aldursbólkum, uttan einum, er greiður meiriluti fyri, at ferðafólk sjálv skulu gjalda. Men millum tey 60 til 80 ára gomlu eru tað eins nógv, ið halda, at landskassin eigur at gjalda fyri kanningina. 

Serliga nógv ung millum 18 og 29 ár halda, at ferðafólk sjálvi eiga at gjalda fyri koronukanningina. 63 prosent av øllum teimum 18-29 ára gomlu halda, at ferðafólk sjálvi eiga at gjalda. 

90 prosent av øllum teimum spurdu halda tó, at tað er rætt at kanna øll ferðafólk, sum koma til landið. 500 fólk vórðu spurd í kanningini.