18 liðugt viðgjørdir sjúklingar eru framvegis á sjúkrahúsi

Fyri einari viku síðani vóru 18 liðugt viðgjørdir sjúklingar á sjúkrahúsunum í Føroyum.   

18 sengur eru 11 prosent av seingjarplássunum í Sjúkrahúsverkinum.

Tað sigur Margit Stórá, landsstýriskvinna, í svari til Jóhannis Joensen, løgtingsmann.

Frá januar til 1. desember í ár hava 125 sjúklingar verið innlagdir á sjúkrahúsunum, eftir at teirra viðgerð er endað.

Tað sigur tað sama sum, at í miðal verða brúktar seks sengur hvønn dag til liðugt viðgjørdar sjúklingar.    

Hetta talið er meira enn tvífaldað síðan 2020.

Hevur kostað 11 milliónir

Sjúkrahúsverkið brúkar danskar prísir til at rokna út, at hetta hevur kostað góðar 11 mió. kr. í ár til 1. desember. 

Liðugt viðgjørdir sjúklingar eru á sjúkrahúsunum, tí teir hava onga aðrastaðni at vera. 

Hava fólk brúk fyri tænastu ella búplássi eftir útskriving frá sjúkrahúsi, eigur Almannaverkið at bjóða teimum, sum eru yngri enn 67, tey.

Kommunurnar eiga at bjóða fólki, sum eru 67 ár ella eldri, tænastur ella búpláss. 

Margit Stórá

Margit Stórá er landsstýriskvinna í almanna- og heilsumálum. 

Alt ov nógvir sjúklingar

Margit Stórá sigur, at alt ov nógvir liðugt viðgjørdir sjúklingar eru á sjúkrahúsunum.

Og talið verður helst størri í framtíðini, tí gomul fólk, sum hava brúk fyri heilsutænastum, verða fleiri, sigur landsstýriskvinnan. 

Fyrisitingin í Almanna- og heilsumálaráðnum er biðin um at kanna, hvørjar loysnir eru.