Vaksandi eftirspurningur eftir elorku

Føroyingar brúktu tilsamans 196,5 GWt fyrra hálvár í ár, sum er 5,4 prosent meira enn sama tíðarskeið í fjør. 

Hetta er samstundis størsti eftirspurningur eftir elorku nakrantíð í einum hálvári, skrivar á SEV á heimasíðuni.

Minni frá vindorku

61 prosent av framleiddu elorkuni var termisk orka, tað er olja, men hini 39 prosentini vóru framleidd úr vatni, vindi ella sól.

Framleiðslan úr vatnorku stóð fyri góðum 26 prosentum, vindorkan kom upp á góð 12 prosent og sólorkan 0,04 prosent.

Afturgongdin er góð 12 prosentstig í framleiðsluni av vindorku, og tað er lutvíst orsakað av breki á trimum myllum hetta tíðarskeiðið.

Meira frá vatnorku

Vatnorkuframleiðslan vaks við 13,8 prosentum úr góðum 46 GWt í fjør í 52 GWt fyrra hálvár í ár. Í juni regnaði í miðal 71,3 mm samanborið við 67,7 mm í juni í fjør.

Sólorkuframleiðslan var 0,04 prosent av samlaðu framleiðsluni og hon sær ikki út av nógvum í stóru myndini, men framleiðslan roynist framvegis væl, skrivar SEV. 

Í juni framleiddi sólorkulundin í Sumba streym til tað, sum svarar til miðalframleiðsluna hjá 77 húskjum. Besta dagin í juni rakk framleiðslan upp á 1,97 MWt.