Góð útlit fyri danskari koppseting

Gongur tað sum ætlað, hevur danski stovnurin Statens Serum Institut eina koppseting móti COVID-19 seinni í ár. Tað boðar stovnurin frá í tíðindaskrivi. 

Stovnurin hevur roynt koppsetingina, sum kallast CoVAXIX, á mýs við góðum úrsliti, og fer í næstum at royna koppsetingina á apur, fyri at skunda undir at fáa koppsetingina góðkenda. 

Gongst sum ætlað, verður koppsetingin tøk longu seint í heyst. Tað sigur Anders Fomsgaard, professari og verkætlanarleiðari.

Talan er um eina ílegukoppseting, sum ger andevni, ið eru før fyri at basa sjúkuni. Vónirnar eru sera góðar, sambært verkætlanarleiðaranum, tí koppsetingin virkar eina tíð og forðar tí sjúkuni í at raka seinni aftur.