37 stilla upp til 18 sessir í umboðsráðnum

37 fólk hava stillað upp til teir 18 sessirnar, sum eru leysir í umboðsráðnum hjá Ognarfelagi tryggingartakaranna.

35 fólk eru í umboðsráðnum, og 18 skulu veljast nú í september.

Valið verður frá 14. til 30.september.

Fyrri parturin, sum sleppur at velja, fær bræv 14.september, og hini fáa brævið 16.september.

15 kvinnur stilla upp

15 kvinnur stilla upp nú. Tá hini 17 í umboðsráðnum vórðu vald í 2018, stillaði eingin kvinna upp. 

Tvær kvinnur eru í umboðsráðnum nú, og tær standa báðar fyri vali hesaferð og stilla upp.  

Fólk, sum hava trygging hjá Betri, kunnu velja fólk í Umboðsráðið.

Fyri fyrstu ferð ber til at velja talgilt hesaferð. Men til ber eisini at velja upp á "gamla" mátan.

Velja nevndina 

Á fyrsta fundinum hjá nývalda umboðsráðnum velur ráðið formann. 

Hanus Toftheyggj í Hvalba, sum var næstformaður, bleiv formaður síðst í apríl, tá Jákup Egholm Hansen legði frá sær, sigur, at hann hevur ikki avgjørt enn, um hann bjóðar seg fram sum formann. 

Umboðsráðið er aðalfundur hjá Ognarfelagi tryggingartakaranna og velur til dømis nevndina í felagnum.