Fylgjarar skulu ikki rinda koronugjald

Fíggjarnevndin hjá løgtinginum leggur dent á, at tey, sum fylgja sjúklingum av landinum, skulu ikki rinda fyri koronukanning, tá tey koma aftur til Føroya.

Í morgin kemur í gildi lógin, sum áleggur øllum at gjalda 312 krónur fyri koronukanning, tá tey koma til Føroya.

Men undantiknir eru sjúklingar, sum fara uttanlands til viðgerðar. Uttanlandstænastan hjá Sjúkrahúsverkinum rindar fyri tey.

Og ætlanin er eisini, at hetta er galdandi fyri fylgjarar. Fíggjarnevndin leggur í sínum áliti dent á, at so er. 

Lógin, sum fer at virka í morgin, fer úr gildi aftur 1.januar næsta ár.

Flutningsfeløgini krevja gjøldini

Flutningsfeløgini, so sum Smyril Line og Atlantic Airways, ella umboð teirra krevja inn gjaldið.

Taks krevur pengarnar frá teimum, sum koma til Føroya við stuttleikabáti ella við fiskifari.

Higartil hevur landið goldið fyri allar hesar kanningarnar.

Latnar eru 23 mió. kr. í eykajáttan til kanningarnar.